вештачко цвеќе

За каква надеж ми зборуваш
кога стеблата се суви
гранките се мртви,
а плодови можам само да замислувам
каков е овој живот со песимизам?
какви се овие пеколни бои?
о,боже направи да бидам вештачко цвеќе.

купувам...

За без пари купувам време.
Од солзи правам стрели
и ги боцкам туѓите срца.
Оддалеку сум песочен часовник
а одблизу само цврст карактер.
Јас само купувам и купувам
страстно и ненаситно
а светот е поле со растурени богатства.

глас

Утрово ненамерно се сетив на твојот глас
што ја носи сериозноста на старите дрвја
кои пак се фалат со дебелите сенки
таков е твојот раскошен,сакан и заборавен глас
а јас сум мала ѕвезда што изгрева на Запад
и во доцните часови
додека другите мирно сонуваат
го довикувам твојот омилен и заборавен глас.

не е важно

Тоа што не ми оди
и што едноставно немам среќа
што не поместив ни една човечка граница
што не поминав километар со тешка книга на главата
тоа сега не е важно
се удавив во солена вода
светците не го слушнаа апелот за помош
а секој неуспех раѓаше солзи
но не е важно
јас стрпливо чекам тркалото да се сврти.

гостинка

Денеска е петок
случајно те сретнав
се беше кажано со една воздишка на трепките
годините не те направиле подобар човек
а јас сум гостинка во црно и црвено
околу мене се трупаат добри и лоши работи
се вртат вретена и тркала
денеска е сабота
а јас сум гостинка што не може да оцени
дали вечерата ќе биде вкусна.

анонимна

На кораб сум во анонимна вреќа
ме пече сонцето темно од црна магија
околу мене ѕвечкаат монети
се движиме од Запад кон Исток
или обратно во непознат правец
ако избегам
ќе ја употребам креативноста
ќе го украсам подводниот свет
ќе бидам близу до сирените
а сепак ќе си останам анонимна.

лоши денови

Имаше лоши денови
кога земјата гореше
кога ми ги отуѓија сите добри особини
кога моите предмети мирисаа на мастило и на страв
кога вложениот труд го фрлив во мирна вода
имаше лоши денови
кога небесниот свод гореше
го запалив со лутината што во мене галопираше.

среќна како факел

Денеска сум среќна како факел што гори
приложив жртва
пролеав солзи и ги удавив непријателите
талентот го задржав во срцето
оној што на вага не можете да го измерите
саканите лица ги вратив на своето место
ставив неколку катанци за никој да не им наштети
денеска сум среќна како факел што гори
бидејќи останаа уште цели пет минути
до големата победа.