богати аматери

Ние сме аматери
богати во душата,
пред нас луѓето
се отворени весници,
ги читаме меѓу редови,
на денот не му даваме
да оди рано в постела,
ние сме богати аматери
оставаме трајни вредности
за својот народ,
ако не купите од нашата фантазија
ќе си земам за право да полудам.

во стаклената градина

Ме стемни во стаклената градина,
од бракот на розата и зумбулот
се роди кокиче.

Во буре со вино
ме фрлија во просторот 
меѓу сонцето и месечината,
молчејќи ѕвездите им ги ожнеав. 

Жива ме вратија 
во стаклена градина да остарам,
и да не се плашам од лошите луѓе,
затоа што имам едно умирање
и поезија за девет животи. 

кралица на емоциите

Во симетријата на фигурите 
во срцето на боите
во телото  на водата
во градот расплакан од дождови
во психата на луѓето
една е љубовта
те тера да мислиш дека си посебен 
и тогаш кога не си
прави да се чувствуваш моќен
и тогаш кога не си 
една е љубовта
кралица на емоциите. 

звукот на моето име

Ги праќаш змиите да ме изедат

додека се вртам по едно неродно дрво.

Ги тераш ветрот и дождот

заедно да ми го превртат чадорот

и животот наопаку.

Ме бришеш од секаде,

а јас се појавувам на сите страни,

за да ти покажам дека нема спас

од звукот на моето име. 

несреќна жено

Несреќна жено
од магла и од хартија
жено со лоши намери
убава само за своето огледало 
немаш време да ме проколнеш
немаш време за бисерни ѓердани 
немаш време да го родиш
својот нероден син,
несреќна жено
ти вели мојот видовид дожд од поезија. 

среќа во кутија од кибрит

Излезе среќата од кутија со кибрит
ја научи азбуката на лажните луѓе
се радуваше како дете
ги разубавуваше убавите жени
запали оган за сите нас
и се врати назад во кутијата со кибрит
во големината на своето
минијатурно гнездо.

сè ќе помине

Сè ќе помине
и популарноста на книгата
што ја читаш
и тајните ќе бидат отворени
кога ќе им помине рокот на употреба
и љубовта и заљубеноста ќе се прегрнат
и духот ќе биде слободен
сè ќе помине
животот ќе си ја истрча
зацртаната патека набрзина
светот ќе се преврти наопаку,
а луѓето ќе останат исти. 

низ солзи и смеа

Низ солзи и смеа ветувам,
ќе ја извадам зората
од кората на јаболкото
што го гризам,
ќе те вратам назад
ќе ги поправам сите твои брчки
ќе те сакам како порано
ќе ги отфрлам строгоста и совршенството,
репризно ќе се заљубам во тебе,
низ солзи и смеа ветувам
во ветувања закопана останав.